Кыргызстан

Тарых

Кыргызстан – Орто Азиянын түндүк-чыгышында жайгашкан. Өлкө түндүктөн Казакстан, батыштан Өзбекстан, түштүк-батыштан Тажикстан, ал эми түштүк-чыгыштан Кытай Эл Республикасы менен чектешет. Кыргызстандын аянты 199,9 миң квадрат чакырым. Деңиз деңгээлинен орточо бийиктиги 2750 метр. Жеңиш чокусу (7439 метр) өлкөдөгү эң бийик жер болуп эсептелет. Кыргызстан - тоолуу өлкө. Республикада түстүү жана сейрек учурай турган металлдар, алтын, көмүр жана башка кен байлыктар бар. Климаты континенталдуу. Дарыялары негизинен Сырдарыяга куят, анын башкы булагы - Нарын. Ысык-Көл, Соң-Көл, Чатыр-Көл, Сары-Челек сыяктуу кооз көлдөр бар. Кыргызстандын калкы 5 миллион адам. Анын 66,9% кыргыздар, 14,14% өзбектер, 10,65% орустар жана 8,31% калган улаттар түзөт. Жалпысынан өлкөдө 80ден ашык улуттардын өкүлдөрү жашайт. Мамлекеттик тил – кыргыз тили; расмий тил – орус тили. Кыргызстан – Чыгыш менен Батышты бириктире турган борбордук азия цивилизациясынын кан жолунда жайгашкан. Сулайман тоо, Өзгөндөгү тарыхый комплекс, Саймалуу таштагы сүрөттөр, Манастын күмбөзү, Таш-Рабат тарыхый кербен сарайы, Бурана мунарасы кыргыз жеринин байыркы тарыхтан калган кереметтери катары бааланат. Кыргыз Республикасынын борбору – Бишкек. Бишкек шаары республиканын саясий, экономикалык, илимий жана маданий борбору болуп эсептелет. Кыргызстан 7 облустан турат. Алар: Баткен, Ош, Жалал-Абад, Нарын, Талас, Ысык-Көл жана Чүй.